طريقه عمل البيض المسلوق على الطريقه المصريه

انا هحل للبنات مشكله عمل البيض المسلوق انا عارف انه صعب بس يلا هساعدكم وامرى لله

اولا المقادير
(1)عدد واحد بيضه او حسب الرغبه اي عدد تحبه
(2)اي حاجه علشان تسلق فيها البيض هى فى مصر بنقول حله او كاساروله اما فى البلاد العربيه بيقولو تنجره ما علينا
(3)شويه ملح وفلفل اسمر انا بحب الكمون كمان
(4)العيش طبعا
(5)كوبايه مايه علشان اكيد هتزور

ثانيا:الخطوات

(1)اول حاجه تقول بسم الله الرحمن الرحيم وتكون نيتك صافيه
(2)تجيب البيضه او البيض على حسب الكميه
(3)تحطها في الحله او الكاسروله فى مصر والتنجره فى الدول العربيه ما علينا زى ما قولت من شويه
(4)تولع النار ويا ريت يكون البوتاجاز اشعال زاتي منعا لحدوث المشاكل ولو بوتاجاز عادي مافيش مشاكل كل واحد وحسب امكانياته
(5)بعدين تحطي الحله علي النار وتحطى مايه فيها تغطى البيض بس متكونش مايه كتير
(6)تتركي البيضه فى المايه
(7)قومي بعمليه المتابعه والمراقبه علي البيض
(ملحوظه ) دي خطوه مهمه وفيها يتم عمليه استمرار المراقبه
( بعد 12دقيقه تقريبا تاخدي البيض وطفى النار بدل ما تولعوا فى البيت
(9)تقومي بعمليه تبريد مفاجئ للبيض لقتل الميكروبات والجراثيم
(10)تضعي البيض في طبق فارغ
(11)تقشري البيض لانه مش هيتاكل بقشره
(12)ترجعي البيض تاني للطبق علشان انتي اخدتيه علشان تقشريه
(13)تاكلي بالهنا والشفا.

انتظروا طريقه عمل البيض المسلوق على الطريقه النرويجيه.

ههههههههه
طريقه سهله
تسلم ايديك

طيب هيا دي طريقه البيض الابيض ولا البيض الاحمر ههههههههههههههههههههه مشكور حكووووووومه

دى طريقه عمل البيض بكل الوانه وشكرا لاهتمامكم