حلقات يوميات زوجيه من الواقع

الحلقه الاولي .....الجواز .. كان اخر حاجه بخطط لها في حياتي ومعرفش ايه الي كعبلني في مصطفى ومن غير ما احس اتجوزته .. على رأي الناس زي شكة الدبوس ولا حسيت بحاجه وعدت سنه على جوازنا والحياه جميله والضحك واللعب والهزار وكل حاجه ماشيه تمام .. بس الي كان مخوفني اني ما حملتش لحد دلوقتي وكنت هتج...نن.. ولما كان مصطفى بيخرج كنت بحط دبدوب تحت الهدوم على بطني واقعد اتمشى في البيت واتخيل نفسي وانا حامل هبقى شكلي ايه ... وبعدين ادخل الأوضه انام عالسرير واطلع الدبدوب من تحت هدومي على اساس اني ولدت .. الله دي الولاده سهله وبسيطه والحمل جميل اومال الستات بتشتكي من الحمل والولاده ليه؟ واقعد احلم بقى بابني الي ربنا هيرزقني بيه بأذن الله .. لا بس انا مش عاوزه ولد لأن الولاد اشقيه اوي ومش بيسمعوا الكلام ده غير ان لبسهم مش حلو زي البنات ومش ناقصين خناشير انا عاوزه بنوته تبقى زي القطه كده هاديه ولذيذه واموره ورقيقه .. وعدت سنه كمان وبدأ القلق يا ربي ايه ده هوه انا مش هبقى ام؟ ومع ان مصطفى مش بيتكلم ولا بيقول اي حاجه ولا بيحسسني باشتياقه لي الأطفال بس انا حسه بيه من حنيته عالعيال ولما بيشوف طفل بيلعب معاه بطريقه لذيذه بتخليني نفسي اجيب له طفل يلعب بيه ومعاه .. ومرت كمان سنه وبدأت الشكوك بقى والكلام يكتر وساعتها قررت اني اتكلم مع مصطفى وقولت له لا لازم نروح لدكتور بقى كده مش هينفع .. وفعلا روحنا لدكتور وقال لنا اننا احنا الأتنين كويسين ومافيش اي حاجه تمنع الحمل بس مسألة وقت .. وعدت كمان سنه تجر سنه وفضلت السنين تتسرسب من بين ايدينا على رأي ليالي الحلمية لحد ما عدى عشر سنين على جوازنا .. وانا دخلت في الخمسه وتلاتين ونصطفى اربعين وقولت له ايه رأيك نتبني ولد او بنت .. مصطفى : لا يا بنتي نتبني ايه بس انا : انا نفسي في عيل يا مصطفى العب بيه ويسليني وياخد بحسي انت مش بتشوف الأعلانات في التليفزيون؟ مصطفى: اعلانات ايه يا حبيبتي بس هوه احنا هنجيب تلاجه؟ انا : لا يا حبيبي بس لما نكبر انا وانت نلاقي حد نتسند عليه مصطفى : طيب ما نتسند على عكاز وبعدين يا حبيبتي نتسند على بعضينا يا اجمل ما في حياتي انا مش عاوز حد يشاركني فيكي انا بحبك ومش عاوز حد يشاركني في حبك انا : مش بهرج وحياتي تعال نجرب نتبني ولد او بنت ونشوف مصطفى : طيب انا عندي حل حلو ايه رأيك ناخد علاء ابن اختي يقضي معانا اخر الأسبوع الجي وشوفي هتستحملي شقاوته ولا لا؟ انا : موافقه ده حتى علاء سكر اوي وانا بحبه اوي وبحب العب معاه مصطفى: متأكده من الكلام ده؟ أنا : طبعا متأكده يا حبيبي وجيه اخر الأسبوع ولقيت مصطفى داخل عليا بعلاء وفي ايده شنطه صغيره واول ما دخلو لقيت علاء بيقولي .. طنط عاوز اعمل بيبيه وبمنتهى الزهول بصيت لمصطفى وقولت له وده بيعمل البيبيه ازاي مش لابس حفاضه؟ مصطفى : حفاضه ايه بس يا حبيبتي ده عنده 5 سنين يعني بيدخل الحمام عادي خديه قلعيه ودخليه الحمام انا : لا طبعا انت بتهرج انا اتكسف ادخله الحمام واقلعه دخله انت مش هوه ولد وانت راجل؟ مصطفى : بتهرجي يا مي لا طبعا انتي الي هتدخليه الحمام انا مقدرش ادخله انا : ليه يعني يا مصطفى مش هوه ابن اختك؟ مصطفى : اه ابن اختي بس انا معرفش في تربية العيال خديه انتي ودخليه الحمام وفي عز نقاشنا لفظيع فوجأت بالولد قلع البنطلون وبيقولي طنط انا قلعت اعمل فين وبطريقه هستيريه قولت له : ولد مكانك وزي ما انت اوعى تعملها على روحك يا علاء علاء : يا طنط عاوز اعمل بيبيه بسرعه .. بسرعه ... يا طنط وجريت اخدت الولد وعلى ما وصلنا الحمام لقيت نافوره سبقانا على باب الحمام غرقت باب الحمام والحيطه والأبواب المجاوره والسجاده .. وفي وسط الزهول وانا مش عارفه اقول ايه سمعت مصطفى فطسان على روحه من الضحك انا : ممكن اعرف بتضحك علي ايه؟ مصطفى : عالحوسه الي انتي فيها يا حبيبتي ... اشربي بقى مش انتي الي عاوزه عيال؟ انا : اه عاوزه عيال بس مش يعملوا بيبه في كل حته كده يا مصطفى مصطفى : مش مشكله انا هنضف الي عمله ادخلي انتي اعملي الغدا انا : الغدا جاهز انا هغير له وافرش السفره لحد انت ما تعمل البلاوي الي عملها دي مصطفى : حاضر يا حبيبتي واخدت علاء غيرت له هدومه وغسلت له وشه وايديه واخدته معايا المطبخ قال ايه عشان يساعدني .. نسيت انه طفل .. واحنا في المطبخ وانا بسوي الرز سمعت طرخ دش .. لقيت لقيت علاء بيحاول ينقل الأطباق معايا فكسر اطباق الطقم الصيني بتاع جوازي وطبعا لأنه طفل ما عرفتش اقوله ايه .. وجيه مصطفى يجري وهوه مخضوض ومش فاهم فيه ايه وطمنته ان مافيش والحمدلله غير طبق الي نجي من المعركه الحربيه الي حصلت من شويه... حطيت الغدا وطبق الشوربه والسلطه قدام كل واحد فينا وبدأن في الأكل ولقيت علاء بيتفرج عالأكل من غير ما ياكل انا : مالك يا لولو مش بتاكل ليه يا حبيبي؟ علاء : مش بحب الشوربه يا طنط انا : طيب كل السلطه يا حبيبي علاء : مش بحب الحاجات الوحشه الي فيها دي انا : حاجات ايه يا حبيبي؟ علاء : الطماطم مش بحبها والخيار مش متقشر وانا مش باكله كده انا : طيب كل الرز يا حبيبي علاء : انا بحبه ابيض وانتي حطه فيه حاجه وحشه انا : طيب اللحمه يا لولو علاء : انا بحب الفراخ انا : طيب جرب الفراخ بتاعة طنط حته نونو يا نونو كده جرب علاء : لا لا لا انا عاوز كنتاكي انا : كنتاكي ايه يا بيبي بس جرب كده .. طيب اقولك كل ملوخيه علاء : مش بحب اكلها دي فيها كخ وريحتها وحشه اوي انا : طيب عاوز ايه يا حبيبي؟ علاء : انا عاوز ماما اهئ انا : لا يا حبيبي مامي ايه دلوقتي جرب بس حته اللحمه دي وطبعا اصريت على رأي الفنان عادل اما اصر يلح الحاحا انه ياكل اللحمه وبدون سابق انذار لقيت حتة اللحمة لابسه في وشي وده زادني غيظ فأصريت انه ياكل اللحمه فمسكت منخيره ودفست حته اللحمه في بقه عافيه .. زي الي بيأكل بطه او وزه .. وفوجأت بنفوره ترجيع طالعه من بقه في وشي خخلتني اعلنت استسلامي وبصوت عالي قولت لمصطفى . انا مش عاااااااااوزه عياااااااااال

ابه يا عم ادهم دور على اللى يقرأ كل ده انا قريت اول سطرين وتعبت مفيش اختصار ههههههههههههههه

hhhhhhhhhhhhhhhh gamda ya 7koma hhhhh
machkor ya abo basha 3al mawdo3 elhilw

يا فاتى قصدك مشكور على الموضوع اللى مش عارفينله اول من اخر هههههههههه

ههههههههههههههههههههههههههههههههههه

ههههههههههههههههههههههه يخرب عقلك يا ابني
هههههههههههه

تسلم حكومه وفاطمه علي مروركم شكلي حبلغ عنكم ويا الحبس يا اما تقرءاو وانتم ساكتين ههههههههههههههههههههههههههههههههههههههههههههههههههه

نقرا ايه بس يا باشا دى الحبس اهون ههههههههههههههههههههههههه

هههههههههههه تصدقي اني حولعلك في النتدي ده

موضوع جميل وشيق هههههههههههههه